『真』東京馬拉松 vs 東京『街』馬拉松
無得飛日本跑,唯有報名東京馬拉松 virtual run 玩下,順道設計一條東京『街』馬拉松路線,聊勝於無,跑左當去左。原本plan好嘅行程係放工由天水圍直奔油麻地,不過放工後起跑身心疲累好難頂。跑到腳痛兼想抽筋,路經深井,老細見我一副死樣,普通燒鵝飯自動幫我upgrade成鵝髀飯,叫做提升返少少士氣,最後剛好睚到 30k 返到屋企。
休息兩天決定完成埋呢個東京『街』馬拉松最後13k。
話駛去『東京』,點都要有 d 日系元素打卡嘅。
1. 『東京』街當然係必經地點啦
2. 沿途可以欣賞下日系美少女美大媽
3. 直飛『成田』影音店
4. 落機當然去『上野』酵素麵包生活館放低行李先啦
5. 放低行李後第一時間去築地食堂,點知執左,只剩返間『北海道』活壽司
6. 醫完肚,女士可能去『銀座』廣場shopping , 男士就緊係去睇動漫玩具啦 (Deep Lifestyles Supply Co, In's)
7. 行到累,有牛肉飯補充體力
8. 『東京』行點都要有手信,果欄直送日本士多啤利返屋企