2016 香港街馬@九龍東

第一次跑街馬@東九龍賽事，說真的，條路雖然都係跑 highway,  但都算係特別，值得支持下。不過有 d 細節野就真係做得唔太好。

首先係 shuttle 安排，6:05 座滿人係屯門開車，唔駛 6:45 已經到左起點，但 8:30 先跑，足足等差唔多兩個鐘，呢樣就係小弟最怕嘅野，所以我一向都好少參加 Disney 個邊 d 比賽。

第二，今次半馬路線同上年應該唔同左，上年聽講只上一次行人天橋，今年前半程已經要上兩條行人天橋再落一條行人隧道，呢兩橋一隧真係拍得主渣馬嘅兩橋三隧；塞車已經辛苦，仲要係一塞車就要停車，4月天的潮濕，跑手的臭汗味，真係暈得一陣陣。其實俾 4xxx人玩嘅賽道，要咁樣排隊上橋落隧道，真係唔得囉，好明顯賽道設計係負荷唔到，寄望下年如果真係有全馬，首先唔好係 4 月，同埋唔好再 x 橋 y 隧啦，呢d 唔應該係街馬嘅賣點，留返俾渣馬啦！

第三，成績查詢

星期三上網 check 返自己成績，竟然係無 net time,  得 official time , 睇完成個人呆左，分段時間係寫 cp 1, cp 2 呢d,  無寫距離咁都得！？要自己上網睇返"常見問題"先知咩叫 cp1 cp2 ，最後証書亦無寫出任何名次，呢 d 都係一般比賽有既野黎，真係無理由無。

話說街馬當日創辦時，其實有好多野都係衝著渣馬而來，需然你係補給同埋打氣都做得好過渣馬，但一 d 路跑賽事嘅基本野無理由做得咁事事旦旦！！順帶一提，個本場刊可唔可以環保 d ,  download pdf 已經好足夠，渣馬都俾人炳左 n 世啦，真心希望你唔好學佢 d 衰野！

都係做返報告俾自己先

咁早去到，好彩都有 d booth 俾我消磨下時間。

  講真條賽道左穿右插，跑完都唔知自己跑過邊到。

終於上到繞道，遠望郵輪碼頭真係好靚，補給有蕉，蕃茄，最驚喜竟然係有 power gel 任拎，早知我唔拎私伙野啦！ 補給完，但心不斷問，幾時落雨呀，好熱呀，望主 2:30 pacer 都追唔到，唔通剛剛 pw 完全馬，連半馬都要 pw?

終於去到 12-13k 左右，期待的大雨終於都黎，爽到爆呀！！ 雨勢仲要越落越大添，原來個刻仲要係黃雨，勁過渣馬場雨多多聲，d 雨水打落身上除左降溫外，仲好鬼痛添呀，決定加速，拿拿臨跑完佢，尤其係要超越 2:30 pacer.

去到 16 k u-turn 位，水站有冰凍嘅佳得樂，真係要讚大會細心的安排，不過果刻淋住雨，反而覺得凍得仔。

終於揾到濕身照，為著呢場黃雨半馬留下一個美好回憶。

落左繞道，仲要上多次行人天橋，好彩跑手距離已經拉開，唔駛再停車。

天氣悶熱，塞車停車蝕駛d 時間，加埋黃雨，最後好彩都無 pw, 完賽有冰菠蘿食，正。不過一停低，就即刻 feel 到凍，要第一時間換返件乾衣再加便利雨衣保溫+擋雨。跑完走人其間收到呢個message:

【AXA香港街馬@九龍東2016】

因黃色暴雨警告及雷暴警告現正生效，為顧及各跑手安全，跑經觀塘繞道之半馬拉松組別已暫停。請留意在場工作人員指示。十公里組別不受影響。

返屋企 check 返新聞，原來係 10:30 左右決定腰斬。不過個刻我都講落左繞道，基本不受影響！

賽後其中一個焦點

淋雨空肚跑街馬 蘇志威暈倒送院 (晴報) 

綜合不同報導，暈倒原因
1. 訓練不足。咩叫訓練足夠其實好難界定嘅，唔同要求就有唔同嘅訓練量，不過老土 d 講，都係要量力而為，唔好亂爆，今次 pb 唔到未下次囉，長跑長有嘛！

2. 賽前休息不足。返夜就無野好講，如果掛主睇英超西甲唔瞓覺就真係唔得囉！ (弊，講中左自己添！)

3. 衰淋雨。 如果平時體質真係驚淋雨的話，個日又真係幾惡頂嘅！其實我都驚淋雨會頭痛，所以當日無論天氣幾悶熱，又無太陽，我都堅持帶帽出賽，第一真係唔想俾雨照頭淋驚頭痛，緊重要嘅係，對於一個四眼佬嘅我黎講，頂帽係用黎幫副眼鏡遮風擋雨，確保視野清晰免 pk 。

4. 無食早餐。呢下就真係大忌，真係死得人，千其唔好試，沿途就算有幾多補給都真係補你唔到！

賽後都有好多跑友留言，最正一句就係佢話唔識得草蜢係邊個，即刻覺得自己好老添@.@